آذر 91 - ...افسانه نیست

...افسانه نیست

شنبه 91 آذر 25 :: 10:20 صبح :: نویسنده : خادم المهدی

مگو حافظ که شیراز بی مثاله                  اً ری چه منطقی گفتی ایانه

کجا نه چا تو گشتی غیر شیراز              تو خو جایی نبیدی غیر شیراز

مو خوندم حالته تا یزد رفتی                 دوسی روزی نبیدی و بگشتی

ایسون توصیف کنم اوصاف شهرم          مو شهروندی ا دسبیل قشنگم

تو رکناباد مین شهر داشتیش              هزاران بار می شعرت اووردیش

ز رودخونه ی دز اگر کنم یاد                 همه نهرا بهشت افتن تونه یاد

که رودی خوشکل و پاک وزلاله               قیاسش پی او رکناباد محاله

امون کل نوکر آشاهچراغیم                     برارش سوزقبانه هدیه داریم

شمون ار شهرتون کل پیر مراده          ای شهرم دس کمی ازتون نداره

کتی بیو نشین می پیر حزقیل         که تو فهمی چه داره شهر دسبیل

اگر سَر اوسیووا تو نشینی                       کُتی پای صدای او نشینی

تو شیراز بوِلی ماشین نشینی            که اُیی زیر پلمون شو نشینی

علی کَلَه دووه وا تار خانی                    َا وَر کوپیته تا کانال ماهی

تیَت تا بور کنه لِف بَتِ اووی                  مین رودخونه کُل بچه سَر اووی

مو شیراز دیدم حافظ عزیزم                   وَر دروازه قرآن جا گزیدم

اَ ور باغ ارم تا ور مزارت                     نبید اووی خوریم ارواح خاکت

دو سی تا ساختمون شاقنیده                 وو مشتی استخون پاره پینه

که یادگاری اَ زمون قدیمه                که اصلش مال شاه شوش نشینه

علم کوردیه وندی بوق کرنا                     که نی مثلش مین تموم دنی

بیو آدرس دهام پلی قدیمی               وسط شهری که تو مثلش نبینی

هَنی کار کنه خوشو ستوناش                  ایانه قدمته ای شهر روناش

مگو پی مو امون نارنج صحابیم            هوامون سرد شو وا زیر لحافیم

ای دسبیل پایتخت پرتقا له                         همی باغاش پر مرکباته

زمسونا شُمون زیر لحافِی                   اُمون ری بونه خُفتیم پی ملافی

خلاصه می زمونی که تو بیدی                   نبیدم تا ای شعرانه تو بینی

مو کوردم پی تو شوخی نازنینم            الان ورسُم سیِت وَحشانه دینوم